Ինչո՞ւ են մարդիկ ծխում

Երիտասարդները թերագնահատում են ծխելու արդյունք հանդիսացող վատ հետևանքների լրջությունը և ծխախոտից կախվածության մեջ ընկնելու վտանգը: Ծխել սկսող երիտասարդները իրենց չեն դասում "ծխողների շարքում”`մտածելով, որ կարող են ծխելու սովորությունը պահել հսկողության տակ և դադարեցնել ծխելը երբ կցանկանան: Ցավոք, դա այդքան էլ հեշտ չէ:

Ծխել սկսելու պատճառները բազմաթիվ են: Ոմանք սկսում են ծխել հետաքրքրությունից դրդված: Ընդամենը մի քանի օրվա ընթացքում հետաքրքրություն վերածվում է սովորության, իսկ սովորությունը` հիվանդության: Շատերը սկսում են ծխել, քանի որ վախենում են տարբերվել իրենց ընկերներից, կարծում են, թե ծխելն օգնում է վայելել տարիքակիցների հարգանքը:Ծխողների մեծամասնությունն իրենց ծխելու վատ սովորությունը կապում է ստրեսի հետ`չհասկանալով, որ ծխող մարդը կրկնակի է ենթարկվում ստրեսի:

Հետազոտությունները ցույց են տվել, որ անչափահասների մոտ 60%-ը սկսում է ծխել,քանի որ ծխախոտը նրանց համար հեշտ հասանելի է: Ծխախոտը տարածված է նաև այն երիտասարդների շրջանում, ովքեր օգտագործում են ալկոհոլային խմիչքներ:

Երիտասարդներին ծխելու դրդող գործոններից մեծ տեղ է տրվում նաև տարբեր տարիքային շրջաններին հատուկ վարքգծի գործոնին: 12-16 տարեկան երիտասարդները հնարավոր է, որ խնդիրներ ունեան ծնողների կամ այլ մեծահասակների հետ և իրենց դժգոհությունն ու անհնազանդությունը արտահայտեն ոչ օրինակելի վարքգիծ դրսևորելու միջոցով: Ալկոհոլային խմիչքների,թմրանյութերի օգտագործումը և հատկապես ծխելը նրանց համար հանդիսանում են անհաշտություններից և խնդիրներից խուսափելու, ինչպես նաև ինքնահաստատվելու միջոց:

Մարդկանց մեծամասնությունը համարում է ծխելը կախվածություն, սակայն իրականում նրանք այնքան էլ ճիշտ չեն: Բացի նիկոտինից, ծխախոտը պարունակում է մոտ 4000 քիմիական նյութ, որոնցից յուրաքանչյուրը կարող է որոշակի ազդեցություն ունենալ մեր նյարդային համակարգի վրա` ժամանակի ընթացքում առաջացնելով մի շարք կապվածություններ:
Խոսքը գնում է մի քանի հազար փոքրիկ կախվածությունների մասին: Նիկոտինից կախվածությունն ինքնին կարող է անցնել մի քանի օրվա ընթացքում (դուք չեք հանդիպի այնպիսի մեկին, ով կախվածություն ունի նիկոտանային մաստակից): Այն մարդիկ, ովքեր ցանկանում են թողնել ծխելը, սովորաբար ձախողվում են: Հետագայում նրանք ասում են, որ փոխարինողները նրանց օգնում են առաջին երկու օրերի ընթացքում, սակայն հետո դադարում են օգնել: Չծխող մարդիկ նրանց չեն հավատում` դա վերագրելով վերջիններիս թուլակամությանը:

Ինչպես տեղեկանում ենք doctors.am կայքից, բանն այն է, որ քիմիական նյութերն օրգանիզմից դուրս են բերվում աստիճանաբար: Նիկոտինը դուրս է գալիս գիշերային քնի ընթացքում: Մնացած քիմիական նյութերի հետ ամեն ինչ ավելի բարդ է, նրանք կարող են դուրս գալ ամիսներ շարունակ, հենց այդ պատճառով ծխողներին դժվար է հրաժարվել ծխախոտից: Դրա հետ միասին գիտնականներն ասում են, որ ծխելը թողնելը հնարավոր է ցանկացած տարիքում` անտեսելով ծխելու տևողությանը: Կարևոր է ուշադրություն դարձնել երկու կարևոր խնդրի: Մեթոդների մեծամասնության անարդյունավետության հիմնական պատճառն այն է, որ դրանք զբաղվում են խնդիրներից միայն միայն մեկով:
  

Առաջինը` ծխելը թողնելուց հետո պետք է անցնել դետոքսիկացիայի կուրս: Կուտակված քիմիական նյութերն արագ չեն կարող դուրս գալ, սակայն Դուք կարող եք այդ գործընթացն արագացնել: Այսօր բժշկության մեջ կան բազմաթիվ դեղամիջոցներ, որոնք կարող են օգնել այս խնդրի լուծմանը: Երկրորդը`անհրաժեշտ է գտնել ծխախոտի հոգեբանական փոխարինողը: Դա կարող է լինել սպորտը կամ ցանկացած այլ բան, ընդ որում, մարդն ինքը պետք է կողմնորոշվի, թե ինչն է իրեն օգնում դիմակայել դրան: